2014年7月27日 星期日

台語,毋是閩南語!!!

講著「台語」,猶原有一寡朋友感覺礙虐(gāi-gioh)。怹堅持用「閩南語」取代「台語」。針對這,有必要來小可解說一下:

1. 1950年代以後才出現「閩南語」這款講法,伊是中國國民黨發明出來--ê,怹ê目的是欲建構文化霸權(hegemony)。



2. 「閩南」是佇啥所在?彼是佇中國ê「閩」ê南部。咱若是使用「閩南語」這个名稱,就是同意台灣mā是包佇中國ê「閩」ê區域內底。

3. 凡勢有人會講,早前來台灣ê移民,誠濟敢毋是ùi中國ê閩南來--ê?為啥物台語袂使號做閩南語?因為,第一,若這款講法會通,一部份ê客家話mā應該ài改做「閩南語」!第二,中國ê閩南區域有幾若種無仝款ê語言,就算講,tsia-ê語言互相有「方言關係」,用一ê泛泛ê地理名詞來代表一款語言,按呢ê做法,誠無適當;做一个比論,蟮蟲仔佮鳥仔lóng是Dinosaur(恐龍)ê後裔(hō͘-è),所以咱應該稱呼鳥仔類做恐龍?!仝款ê道理,雖罔台語佮中國閩南地區ê方言有親成關係,mā袂使因為按呢就講台語是閩南語(鳥仔是恐龍?!)。

4. 「台語」這个詞是ùi日本時代來--ê。「台語」代表ê意思是彼當時ê通用語,日本人毋捌kā伊當做「台灣ê語言」ê意思來用。若台語=台灣ê語言,臺大毋就是台灣ê大學囉?!若按照按呢ê logic 推考落去,台中是台灣ê中部,台南是台灣ê南部,台東是台灣ê東部?!

5. 刁工kā一个泛泛ê地理名詞特殊化,才koh來講伊是某物語言ê名,koh刁工kā某物語言舊底tō有ê稱呼變做一般名詞:閩南語 -> 台語,台語->台灣的語言;這款手腕正正是中國國民黨建構文化霸權,使弄南島語族佮客語族群,tsham台語族群做對頭的歹譜。

台語就是台語,台語歌就是台語歌。準講你無佮意台語這ê詞,欲改,mā tō ài這ê語言ê母語人去重新kā號一个名,絕對毋是用中國國民黨刁工創--ê,「閩南語」這款不tat不七ê碗糕名稱。

沒有留言:

張貼留言

這篇文章讓你有什麼感覺/感想呢?請讓我知道。

Related Posts Plugin for WordPress, Blogger...